საქართველოში, რომელიც კაცობრიობის მიერ აღიარებულია ღვინის სამშობლოდ, ჭაჭის გამოხდის ტრადიცია შედარებით გვიან, მე-19 საუკუნის პირველი ნახევრიდან იწყება. თელავის ღვინის მარანის საუკუნოვან გამოცდილებაზე დაყრდნობით, გადავწყვიტეთ - პირველად ისტორიაში, ქართული ჭაჭა დედამიწის გარშემო სამოგზაუროდ საზღვაო ხომალდით გაგვეგზავნა და მასზე გამოგვეცადა ზღვაზე დავარგების უნიკალური ზეგავლენა. უძველესი მოგზაურების მიერ შთაგონებული ამ ექსპერიმენტის მიზანი ჭაჭის დახვეწის პროცესში მისი საგემოვნო თვისებების გაუმჯობესება იყო, რაც ზღვაზე მუდმივად რწევის, ცვალებადი ატმოსფერული წნევის, ტემპერატურისა და ოპტიმალური ტენიანობის შედეგად მიიღწევა.

მოგზაურობა 2022 წლის დეკემბერში დაიწყო ფოთიდან, მომდევნო 9 თვე კი მარანის ჭაჭამ ზღვებსა და ოკეანეებში გაატარა, ამავდროულად მოიარა პორტები მსოფლიოს ისეთ ქვეყნებში, როგორიცაა თურქეთი, სინგაპური, ავსტრალია, ახალი ზელანდია, ბრაზილია, ურუგვაი, არგენტინა, ესპანეთი და საბერძნეთი. აღსანიშნავია, რომ მან 4-ჯერ გადაკვეთა ეკვატორის ხაზი და ჯამში დაახლოებით 61,500 საზღვაო მილი გაიარა, ამ დროის მანძილზე მისი არომატი თანდათანობით მდიდრდებოდა და იძენდა გასაოცარ გემოვნურ თვისებებს.

მრავალთვიანი ოდისეიდან დაბრუნების შემდეგ, ზღვაზე დავარგებულმა ჭაჭამ ჩვენს მიწისქვეშა მარანში გადმოინაცვლა, საბოლოოდ კი მთის ანკარა წყაროს წყალთან შეზავებით შეიქმნა მარანი ჭაჭა ეკვატორ პურემარე, რაც ლათინურად სუფთა, კრიალა წყალს ნიშნავს.